काठमाडौं । नेपाल कम्युनिस्ट पार्टीका स्थायी समिति सदस्य विषम सीले अहिलेको लोकतान्त्रिक गणतन्त्र अस्थायी टहरा भएको बताउनु भएको छ । लुम्बिनी प्रदेश – काठमाडौं समाजवादी सम्पर्क मञ्चको आज काठमाडौंमा सम्पन्न प्रथम भेलामा प्रमुख अतिथिको रूपमा बोल्दै उहाँले सो कुरा बताउनु भएको हो ।
स्थायी घर समाजवाद बनाउनुपर्ने भएकोले सबै एक भएर संघर्ष गर्नुपर्ने उहाँको भनाइ छ । कम्युनिस्ट पार्टी यथास्थितिमा बस्न नसक्ने साथै एक कदम अगाडि देख्न सक्ने कुरा बताउँदै उहाँले नेकपाले देशको विद्यमान समस्या समाधानका लागि नेपाली विशेषताको समाजवाद स्थापनाका लागि नयाँ विचार र योजना अगाडि बढाएको स्पष्ट पार्नुभयो ।
त्यसैगरी नेकपाकी पोलिटब्यूरो सदस्य खुमा सीले अहिलेको परिस्थितिमा देशले क्रान्तिको माग गरेको बताउनुभयो । दलाल संसदीय व्यवस्थाले नेपाली जनताको हितविपरीत गतिविधि गरिएको हुँदा यसका विरुद्ध संगठित भएर लाग्नुपर्नेमा उहाँले जोड दिनु भयो ।
भेलाले अविनास सी.को नेतृत्वमा १५ सदस्यीय प्रदेश समिति र मातहतको जिल्ला समिति निर्माण गरेको छ । कपुरधारास्थित नेकपा, काठमाडौं जिल्ला कार्यालयको सभाहलमा विष्णु सी.को अध्यक्षता र अविनास पौडेलको सञ्चालनमा भेला सम्पन्न भयो ।
