पाल्पा । पाल्पाको पहाडी सुन्दरता माझ बसेको एउटा सानो गाउँ बगनासकाली गाउँपालिका वडा नं. ८, बराङ्दी–बेलौतिखरकमा जन्मिएका सुशिल बस्याल ‘राष्ट्रप्रेमी’ नेपाली युवा पुस्ताका लागि प्रेरणाको स्रोत हुन् । सानैदेखि समाज र देशको रूपान्तरणमा सक्रिय रहँदै उनले जीवनका अनुभवहरू बटुलेका छन् र ती अनुभवलाई सामाजिक चेतना र राष्ट्रिय जागरणका बाटोमा प्रयोग गर्दै आएका छन् । विद्यालय जीवनदेखि नै उनी सामाजिक, शैक्षिक र साँस्कृतिक गतिविधिमा अग्रपंक्तिमा देखिँदै आएका छन् । विद्यार्थी जीवनमै सक्रिय अभियन्ता, जिम्मेवार नेतृत्वकर्ता र सकारात्मक सोंचका धनी युवा भई उनले सामाजिक उत्तरदायित्वको बाटो रोजे । शिक्षकको रूपमा सेवा गरेर उनले शिक्षा, अनुशासन र नेतृत्वको पाठ व्यवहारमै उतारे, जसले उनको व्यक्तित्वलाई परिपक्व बनायो ।
स्वतन्त्र विद्यार्थी युनियन (FSU) को चुनावमा उनी ‘Man of the Election’ बने जसले उनको लोकप्रियता, नेतृत्व क्षमता र जनसम्पर्क शक्ति स्पष्ट पार्यो । त्यसपछि उनले आफ्नो नेतृत्वको ऊर्जा सामाजिक अभियन्ता र राष्ट्रिय चेतनाको रूपान्तरणमा समर्पण गरे । शिक्षा क्षेत्रमा पनि उनी अब्बल छन । अर्थशास्त्र र समाजशास्त्रमा स्नातक गरेका उनले अध्ययनलाई जीवन र समाज परिवर्तनको माध्यम मानेका छन् ।
देशको वास्तविक अवस्था र युवाको भावना उजागर गर्ने देशभक्ति गीत ‘राष्ट्रप्रेमी’ सार्वजनिक गरेर उनले हजारौँ युवाको मन जिते । त्यस गीतको आत्मा उनको जीवन दर्शनसँग मिल्दोजुल्दो छ । देशको माया, प्रकृतिको सम्मान, र युवा क्षमताप्रतिको विश्वास। यही भावनालाई व्यवहारमा रूपान्तरण गर्दै उनले सञ्चालन गरेका छन् ‘एक घर, एक लालीगुराँस’ अभियान, जसले घर–घरमा राष्ट्रियता, वातावरणीय चेतना र प्रकृतिप्रेमको भावना जगाएको छ। यस अभियानमार्फत उनले नेपालको राष्ट्रिय फूल लालीगुराँसलाई राष्ट्रिय एकता र सौन्दर्यको प्रतीकका रूपमा स्थापित गर्न योगदान दिएका छन् ।
सुशील बस्यालले मठ–मन्दिर, खानेपानी, र गाउँ विकाससँग सम्बन्धित समितिहरूमा सक्रिय नेतृत्व गर्दै आएका छन् । सामाजिक सेवामा उनको योगदान उल्लेखनीय छ—वृद्धाश्रममा दशैंको टीका, दर खाने कार्यक्रम , खाद्यान्न वितरण, कोरोना महामारीमा शैक्षिक सामग्री वितरण, सार्वजनिक संस्थामा राष्ट्रिय झण्डा हस्तान्तरण र संरक्षण, स्वच्छता र वृक्षारोपण अभियान सञ्चालन, र युवा सचेतना तथा नेतृत्व तालिमहरू सञ्चालन गर्दै आएका छन् । यी कार्यहरूले उनलाई इमानदार, जिम्मेवार र विश्वासयोग्य समाजसेवीको रूपमा स्थापित गरेका छन् ।
सामाजिक क्षेत्रसँगै उनी पत्रकारिता र साहित्यमा पनि उतिकै सक्रिय छन् । उनका समसामयिक लेख, कविता र निबन्धहरू विभिन्न पत्रपत्रिकामा प्रकाशित भएका छन्, साथै पुस्तक सम्पादकको रूपमा उनले लेखन र सम्पादनको सन्तुलित योगदान दिएका छन् । उनको लेखनशैली भावनात्मक, देशभक्तिपूर्ण र यथार्थवादी छ । जहाँ शब्दमा चेतना र आवाजमा विश्वास झल्किन्छ ।
उनको व्यक्तित्वमा राष्ट्रिय पहिचान, संस्कृतिप्रेम र आत्मविश्वास झल्किन्छ । पाल्पाली ढाका टोपी, ढाकाको स्टकोट, र साधारण पहिरनमा प्रस्तुत हुने उनको रूप बाहिरी सजावट होइन । देशप्रेम र आत्मगौरवको प्रतीक हो । उनको बोलीमा दम छ, विचारमा आगो छ, र हृदयमा मातृभूमिप्रतिको अटल माया ।
हाल उनी कुनै पनि राजनीतिक दलमा आबद्ध छैनन् । उनी स्वतन्त्र र निष्पक्ष सामाजिक अभियन्ताका रूपमा युवामाझ काम गर्दैछन् । उनको मान्यता छ । “दल बदलिँदै जाँदा देश बदलिँदैन, सोंच बदलिँदा देश बदलिन्छ।” त्यसैले उनी दलभन्दा माथिको राष्ट्रिय सोचका प्रतिनिधि बनेका छन् ।
सुशिल बस्याल ‘राष्ट्रप्रेमी’को यात्रा सानैदेखि सक्रियता हुँदै अनुभव, सेवा, नेतृत्व र राष्ट्रिय योगदानसम्मको पूर्ण कथा हो । उनले सपना, सेवा र राष्ट्रिय प्रेमको प्रतीक भएर सिङ्गो नेपाली युवापुस्तालाई जागृत र प्रेरित गरिरहेका छन् । उनको जीवन सन्देश छ “सपना त्यही हो, जसले तपाईंलाई निद्राबाट उठाउँछ; र देशप्रेम त्यही हो, जसले तपाईंलाई कर्ममा जागाउँछ ।
