काठमाडौं । विप्लव नेतृत्वको नेपाल कम्युनिष्ट पार्टी (माओवादी) ले चुनाव चिन्ह ‘गुलाफको फूल’ पाएको छ । निर्वाचन आयोगमा पार्टी दर्ता भएसंगै सो पार्टीले उक्त चुनाव चिन्ह पाएको हो ।
दल दर्ताको प्रमाणपत्र र चुनाव चिन्ह लिन विप्लव लगायत नेताहरू बाजागाजा सहित आज निर्वाचन आयोग पुगेका थिए । प्रमाणपत्र र चुनाव चिन्ह पाएसँगै आयोग परिसरभित्रै बाजागाजासहित र्याली निकालिएको छ ।
नेत्रविक्रम चन्द ‘विप्लव’ ले युद्धकालीन माओवादी ब्युँताएका हुन् । सुरूमा नेकपा दर्ताका लागि निवेदन दिएका विप्लवले अर्को पार्टीसँग नाम जुधेपछि कम्युनिष्ट पार्टी नेपाल (कपाने) दर्ता गराएका थिए ।
अहिले माओवादी लगायतका घटक मिलेर नेपाली कम्युनिष्ट पार्टी दर्ता भएसँगै विप्लवले पुरानै नेकपा (माओवादी) कायम राखेर दल दर्ता गरेका हुन् । उनको दलको १०५ सदस्यीय केन्द्रीय समितिको नामावली निर्वाचन आयोगमा पेश गरिएको छ ।
