काठमाडौ । सुनचाँदी व्यवसायीको आन्दोलनप्रति श्रमिक समुदाय मोर्चा नेपालले ऐक्यबद्धता जनाएको छ । मोर्चाका अध्यक्ष रामलाल सी. लगायत केन्द्रीय सदस्यहरु रत्नपार्कस्थित व्यवसायीको रिले अनशनमा उपस्थित भएर आज ऐक्यबद्धता जनाएको हो ।
राज्यले व्यवसायीहरुको माग छिटो भन्दा छिटो पूरा गर्नुपर्नेमा रामलाल सी.ले जोड दिनुभएको छ । अनशनमा मोर्चा बागमती इन्चार्ज पदम सी लगायतको उपस्थिति रहेको थियोे ।
नेपाल सुनचाँदी व्यावसायी, कालीगढ तथा संघर्ष समितिको रिले अनशन १८ दिनदेखि जारी रहेको छ । सरकारले गत जेठ १५ गते बजेटमार्फत सुन तथा बहुमूल्य पत्थरमा भ्याट, कर र अतिरिक्त शुल्क, लगाएर आम उपभोक्ता र सुन चाँदी व्यवसायीहरुलाई मारमा पारेको भन्दै उनीहरुले रिले अनशनमार्फत विरोध जनाएका हुन् ।
सुनमा लगाइएको २ प्रतिशत विलासिता कर खारेज गरिनुपर्ने, कानुनबमोजिम नगदसरहको सम्पत्ति कार्यान्वयन गरिनुपर्ने, हिरा, जुवाहरत पत्थरमा लगाइएको १३ प्रतिशत भ्याट खारेज हुनुपर्ने, कोटा प्रणाली खारेज गरी २५, ५० र १०० ग्रामका सुनका टुक्राहरु करचुक्ताको आधारमा गहना उत्पादक तथा कालिगढ र व्यवसायीहरुले सहज रुपमा खरिद गर्न सक्ने व्यवस्था गरिनुपर्ने उनीहरुको माग छ ।
